|
|
|
|
|
 |
|
|
|
منحوس يا شارع الغلابه
وسكانك كلهم مساكين
فى نهارك زعيق وخناق
وفى ليلك بشر ساكتين
من بعد الشقى والتعب
جنب الحيطان نايمين
ياريت تحكى حكايتك
وكل البشر سامعين
يمكن نلاقى قلوب
ترحم بطون جعانين
شارع طويل وعريض
والخلق راحين وجايين
وناس فارشه الرصيف
وجنب همهم قاعدين
بعيون مليانه حيرة
وحبات العرق نازلين
بتشكى هموم الفقر
لناس أكيد جاهلين
تسمع من عمى عبده
يقول بقينا تايهيين
فى زحمه وغلا وبطاله
وأه اسمنا عايشين
وياما أشتكينا وصرخنا
ويا ريتهم بنا حاسين
خلاص فقدنا الأمل
لحد يوم الدين
ويزعق عمى سعد
وفى ايديه ما سك سكين
بيسنها على حجر
وغيظه مع الشرار طايرين
وهدومه أكلها الزمن
وكلام عنية شاكين
حالنا لا يسر عدو
ولفقر الأباء وارثين
ودى أحوال الغلابة
اللى دخلها جنهين
وكل ما نقول اتسترنا
نرجع لورا قراطين
ويرد عمى ربيع
وجنبه تشوف يا سمين
بنت شعرها منكوش
ماشيه ورجلها حافين
ما دخلت مدارس
ولا تعرف لطا ولا شين
حرمها الفقر منهم
وهى وأبوها ماشيين
بيقول يا خلق حرام
كفيانا بكاء وأنين
اتركوا شارع الغلابه
وأرحلوا لبلاد عارفين
أيه هى حقوق البشر
ولمعنى الحقوق فاهمين
ويكمل عمى خليل
ويقول كلنا حلوين
بناكل ونشرب ونلبس
وعلى دينا أكيد ما سكين
ونعرف معنى الحلال
ولأصول الأدب شاربين
لا نعرف نسرق وننصب
ولأى حرام كارهين
صحيح نقصنا كتير
وحاجات كتير غايبين
نسينا لبس الحرير
وما عاد غير البوبلين
وزعلان يا عمى ربيع
ما اللى اتعلموا قاعدين
وبصوت أجش وعريض
لراجل يقول شايفين
ولدى سابنى ورحل
وضاع مع الضايعين
بعنا هدومنا عليه
وأنت يا ولدى فين
غرقت فى بحر الغربه
وأصحابك جابوك شايلين
اسمع كلام شهاداتك
يقولوا لك يا بيه اسفين
بجد صعبان علينا
وعيونا عليك باكين
وتصرخ خالتى فاطمة
وتقول للمر بقينا شاربين
بيعدى يومنا علينا
ما نعرف بأيه واكلين
ولا بأيه نسدد ديونا
ولا أمتى لفرحنا راجعين
خلاص لبسنا السواد
وما بقينا لفرحنا فاكرين
وهى دى حكايتى
ويا ريتها تسر العين
لأحوال الغلابه فى شارع
لسه حيطانه طين
وتشوف بتاع الضرايب
ومعاه بتاع تموين
غاوى يحرر محاضر
لناس كلها جعانين
وسايب اللى معاهم
مادام أكلوه فى الحين
ورسوم نضافه وخلافه
وكأننا فى بساتين
وحولينا أكوام زبالة
بتشكى تقول يا مين
يرحم الخلق منى
وكفايه كلام تسكين
وتسمع من أم وفاء
يا خلق خليكوا شاهدين
صاحب الشقة طردنى
وأنا ساكنه بقالى سنين
عاوز يهد البيت
ويبنى مكانه برجين
ولما روحت اشتكيت
قالولى وانتى قصاده مين
دارى امورك يا حاجة
فيه ناس لهم ساندين
عوضنا عليك يا رب
وبندعى تتعدل الموازين
وترضى عنا الحكومة
وتعامل البشر باللين
وتيجى تزور شارعنا
ونحس بولاء وحنين
ونغير أسم شارعنا
بشارع عماد الدين
|
|
|
| |
|
|
|
|
|
|
|
|
|
