يادى الحوسه فى بلد الكوسه
بتخلى الاعمى قبطان
واللى يفكروا لجل بلدهم
قالوا عليهم ناس عميان
واللى يغنى ومش بيغنى
بالكوسه عملوه فنان
لما نسينا  افراحنا خلاص
وكرهنا بلد الجدعان

يادى الحوسه فى بلد الكوسه
اخدوا الكرسى من الانسان
اللى بيعمل ليل ونهار
وعاوز بلده تعيش فى امان
وابن البيه ركبه مكانه
وخلى افراحنا أحزان
اصل ابوه مسنود على الاخر
ولازم لابنه نلاقى مكان
ناجح راسب ده ما يهم
اللى يهم ابوه عدنان
لحسن يغضب ولا يكشر
ويرمينا فى وسط البركان

يادى الحوسه فى بلد الكوسه
وواحد جمع بالاطنان
كام مليون زائد مليار
واحنا فى جيبنا باكو لبان
طالع واكل نازل واكل
واحنا بنقرش على الاسنان
كاتمين غيظنا جوه قلوبنا
ولبسنا طرح النسوان