قصيدة رسالة لشيخ البلد

أنت بجد عاملها دماغ
وأحنا دماغنا ناقصها علام
تقعد تمشى تاكل تشرب
وأحنا فى حضن الهم ننام
لما تشاور ولا تأشر
بص شوف بقوا جنبك كام
واحنا نزعق ولا نهاتى
لما لقينا أحزانا أكوم
برده بنقف ونسقف لك
واللى بناخده كلام فى كلام
مين يوافق على اللى بيجرى
همه يا دوب حبة أقلام
اللى خايف من الكرباج
واللى ناسى بأنه حرام
واللى باصص على الدولارات
واللى ناوى يشوفها ظلام
واللى يخطط واللى يبطط
واللى شايل على صدره وسام
من دم الناس الشقيانه
وفاكرينها فى الصالح العام

ما أنت الوارث والموروث
وأحنا ورثنا منك أيه
فقر وجهل وجوع وبطاله
وبتسألنى أنا بزعل ليه
على أحوالنا ومستقبلنا
ومصيرنا اللى انت ناسيه
ومش فاكر غير الكرسى
طب والكرسى نفعنا بأيه

جرب مرة تعيش ويانا
وتشوف أحوالنا التعبانه
اللى بيصرخ واللى بيبكى
واللى بطونهم نايمة جعانة
واللى بيلعن يومه وأمسه
وشايفها بكرة بأسانه
يمكن تعرف مين جوعنا
وبلدنا بالخير مليانه

فيه كام واحد باعو بلدنا
وباعونا ببلاش وياها
وقالو سياسة وما نعرف
كام نيه سكنت جواها
وبعد أيام وشهور لقناهم
سرقوها وما رحموا بكاها
ولا رحموا حتى اولادها
ولا سابو حاجه لدواها