|
|
|
|
|
 |
|
|
|
غلبان وليه لسان
غلبان وليه لسان
لسه صاحى بيتكلم
ما عرف مره السكوت
وطول عمره بيتعلم
ازاى يقول الحقيقة
مهما كان بيتألم
ومهما حاولتوا سكوته
عمره فى يوم ما هيسلم
غلبان وليه لسان
بيقول للظلم كفايه عليك
ظلمت أهل البلد
اللى كانوا حواليك
وعامل كبير بيهم
والعظمة ساكنه فيك
وسرقت بسمتهم ومالهم
وبالظلم اخدته ليك
مسيرك فى يوم يا ظالم
أشوف الحديد فى ايديك
انا مش واطى ولا هطاطى
مهما تبان جبروت
ومهما دقت العذاب
أو حتى لقيت الموت
لا أنت اله الكون
ولا أنا بقيت عفروت
يونس نجاه ربنا
وهو فى بطن الحوت
الفرق بينى وبينك
أن أنت سلطتك سنداك
وعصابة وقفه جنبك
وحراميه واقفه وراك
مه لو أنت عارف ربنا
كان ايمانه نهاك
لكن شيطانك شيطنك
ولحب الكراسى غواك
ونسيت حقوق الغلابه
وسرت فى درب هواك
وفاكر أنك ناصح
وما نعرف أيه جواك
مهما تطول الليالى
مسير شمس الحقيقة تبان
وبكرة الاخرس هيتكلم
لو حتى بنصف لسان
والاعرج هيجرى وراك
مهما يكون تعبان
ونشوف شيخ بلد تانى
يعرف يعنى ايه أنسان
|
|
|
| |
|
|
|
|
|
|
|
|
|
