فلسطين المقاومة والنضال

شعر : محمد ضباشه

 

القدس من فجر التاريخ مهد للديانات

اصلها عربى وبالعربى بلاش اشاعات

ومهما طال المستحيل وقالوا عليه دا مات

أبطال فلسطين وأطفالها بكرة يرجعوا اللى فات

وتعود القدس من الغربة رافعة لنا الرايات

وتنادى على أولادها وعلى روح ابنها عرفات

تعالوا فى حضنى والمحتل فى خيبة الأمل هيبات

————–

دم الشهيد على التراب لكل العالم باين

بيصرخ بأعلى صوت أنا للتراب صاين

وولادك حبايبك ما حد منهم خاين

وأن هان التراب على الخونه وكل أعدائك

ترابك يا حبيبتى عليه مش هاين

—————

أيه يعمل الحزن والأيدى مكتوفة

نايم بيبكى فى قلب عيونه مطروفة

وسجين محاصر بسلك ورقيته ملفوفه

كسر جدار الحزن وحطم ببان السجن

وأمشى فى طريق الموت والسكة معروفة

—————

أوعاك تخاف لو أنكتب عليك الموت هتموت

ومهما كانت الحواجز وعاوز تفوت هتفوت

بس يموت الخوف وبلاش كلام وسكوت

وصحى ليلك وخد كفنك لو حتى ورقة توت

وشويه حجارة فى يد والتانيه ماسكة بالنبوت

وحرر لو شبر واحد وأكتم لآخر صوت

—————

صعبان عليه الدم وأحنا دمنا غالى

نازل من القلب يغلى وأنا بتشكى على حالى

ومش قادر أقول معاك ولا وأنا مالى

صدقينى يا فلسطين انك دايما على بالى

وياريتنى بملك سلاح … كلامى رسمالى

————-

ما تزعليش يا فلسطين ولا تغضبى منى

أنا لو بيدى أديكى بدل الدموع دمى

ما أنت فى عرف العرب فى مقام أمى

وعلى أرضك ولادك وفيهم ولاد عمى

طب قولى بسم الله وعلى الرجال سمى

ونورى لهم طريق النضال ياله بقى همى

احلف لل وتصدقينى انا فى النضال امى

—————

أوعاك تفتكر يا شهيد أن احنا ناسينك

ولو نسيوك حبايبك بتاريخك نظل فاكرينك

ودمك وتراب الوطن قاعدين وشيفينك

وعدوك من بسالتك وخوفة لسه عارفينك

وعرفوا اخواتك اللى كانوا شيلينك

يا ريت نكون زيك ونشوف كلنا بعينك

—————-

ليه وأحنا محتلين نقعد ونتخانق

ونتفرق ونتحزب ونتكلم كلام خانق

ولجل حب السلطة ننصب لبعضنا مشانق

يا ريت نأجل حسابنا لبعد ما نتحرر ونتعانق

————

حرام علينا اللى ماتوا علشان نكون أحزاب

وعدونا شايل سلاحة وواقف قريب من الباب

مع أننا أخوات وليه نكون أغراب

أنسوا الكراسى والمناصب كله يا عربى سراب

وحاربوا العدو اللى عاوزها خراب

واتعلموا ازاى تكونوا شله من الآحباب

—————

بلاش الطمع ياخدكم سنين وسنين

لموا الجنود وأفتكروا صلاح الدين

أحلف بالله وعلى كل مله ودين

أن العدو عمرة ما يفارق أرضنا باللين

————–

فتح وحماس كل واحد منهم فى فريق

وفرص السلام بالشكل دة بتضيق

ونقعد سنين ندور على حلم السلام تانى

ونقضى باقى العمر عايشين على امانى

————–

يا ريت يا عرب تكونوا ايد واحدة

فلسطين يا عرب أصلها بلد واحدة

بلاش تمزق وتمسكوا لبعض على الواحده

واتعلموا من الغرب يعنى ايه وحده

—————

ليه السلام الامريكى بيرفرف بجناح مكسور

نحاول نداوى فيه نلقاه جناح مشلول

وتقول مش أنا السبب شوفوا مين السئول

وكل حلفائها يقولوا والله الكلام معقول

يا امريكا لو سلامك كده ياريته يغور

من بعد العراق وفلسطين وسوريا ولبنان

وغيرهم كتير يا عرب مين عليه الدور

————

اصل السلام عربى وابن بلد بصحيح

وكل كلامنا سلام والرد علية تجريح

فى بلدنا نقدسة وكأنه ولى فى ضريح

وانتم بتلطخوه بعويل ونار وصريخ

مع انه سهل المنال وبالحق تشوفة مريح

—————-

يا اسرائيل خديها كلمة واعملى بيها

من مصلحتك ان ارض العرب تعود ليها

لا الشرع ولا القانون يعطيكى الحق تعاديها

لمى جنودك ونارك الى حدودك بلاش تخطيها

خطر المقاومة جوه ارضك هيدمر كل شيىء فيها